Адам Адеби

Биринчи түрү: Ибадат кылуудагы сабырдуулук.

Ибадаттагы сабырдуулуктун негизи дин түркүктөрү болгон ибадаттарды аткарууда байкалат. Мисалы, намазды алсак:

"Үй-бүлөңдү намаз окууга буйру жана сабырдуулук кыл"(ТО-ХА, 132)

"Намаз окуу жана сабырдуу болуу менен Алладан жардам тилегиле, бул Алладан корккон адамдар үчүн гана жеңил"(БАКАРА, 45) деген ж.б. аяттар бар.

Мусулман адам ибадаттарды аткарууда айлана-тегерегиндегилердин ар кандай каршылыгына сабыр кылууга тийиш. Ошондой эле айланаңдагылардын да сабырдуу болууга үндөө зарыл. Касиетүү Күранда сабырдуу жана сабыр кылууга үндөгөн адамдар гана ийгиликке жетери тууралуу: "Асырган ант. Албетте, ар бир инсан зыянга учурайт. Бир гана ыйман келтирген, соопту амалдарды жасаган, бири-бирине акыйкатты жана сабырдуу болууну насаат кылгандар(зыянга учурабайт)"(АСЫР 1,2) деп айтылган.

Экинчи сабырдуулук: Күнөөдөн сактануудагы сабырдуулук.

Күнөөнүн баары пенденин напсисине жагымдуу, аткарууга жеңил болот. А андан сактануу өтө сабырдуулукту талап кылат. Ошон үчүн Пайгамбарыбыз С.А.В: "Бейиш кыйынчылыктар менен курчалган, тозок болсо, напси каалоолор менен курчалган" деп айткан. Кыйынчылыктарга бет алуу жана напси каалоосунан качуу сабыр менен гана ишке ашат. Алла ыраазылыгына жетүү үчүн сабырдын даамын татуу зарыл болот. Биз баарыбыз: "Оо, Алла, бизге сабыр бергин жана жаныбызды мусулман абалда ала көр"(ААРАФ 126) деп дуба, тилек кылууга мажбурбуз.